ບໍລິສັດ ພົງສະຫວັນ ປະກັນໄພ ເອພີເອ ແລະ ບໍລິສັດ ສາຍຝົນ ໂບຼກເກີປະກັນໄພລາວ ຈຳກັດ ໄດ້ລົງນາມສັນຍາຄູ່ຮ່ວມມືຍຸດທະສາດ ໂດຍທັງສອງຝ່າຍຈະເຮັດວຽກຮ່ວມກັນເພື່ອການຈຳໜ່າຍປະກັນໄພຜ່ານແອັບພລິເຄຊັ່ນ Saiyfon. ເຊິ່ງຈະເປັນການອຳນວຍຄວາມສະດວກໃຫ້ແກ່ລູກຄ້າ ໃນການຊື້ປະກັນໄພຜ່ານແອັບດັ່ງກ່າວ. ນອກຈາກນີ້, ສອງບໍລິສັດຍັງຈະຮ່ວມກັນປັບປຸງແອັບພລິເຄຊັ່ນ ເພື່ອໃຫ້ຕອບສະໜອງກັບຄວາມຕ້ອງການຂອງລູກຄ້າ ແລະ ລັດຖະບານໃນຕໍ່ໜ້າອີກດ້ວຍ.
ທັງສອງຝ່າຍຍັງໄດ້ເຫັນດີໃນການຮ່ວມມືຄິດຄົ້ນພັດທະນາກ່ຽວກັບຄວາມຖະນັດ ແລະ ນຳໃຊ້ປະໂຫຍດຈາກຈຸດແຂງຂອງຕົນເອງ, ລວມເຖິງ ການປັບປຸງ ແລະ ຍົກສູງລະດັບຄວາມສາມາດທາງດ້ານດິຈິຕອນເພື່ອການຮ່ວມມືພັດທະນາໃນກ້າວຕໍ່ໆໄປ.
ທ່ານ ດີນ ໂຣເບີດຣ໌ສັນ,ຜູ້ອຳນວຍການໃຫຍ່, ບໍລິສັດ ພົງສະຫວັນ ປະກັນໄພ (ເອພີເອ) ຈໍາກັດ ໄດ້ກ່າວໃນພິທີວ່າ, ພົງສະຫວັນ (ເອພີເອ) ຂໍສະແດງຄວາມຊົມເຊີຍມາຍັງ ບໍລິສັດ ສາຍຝົນໂບຼກເກີປະກັນໄພລາວ ຈຳກັດ ທີ່ໄດ້ເປີດຕົວຄວາມສາມາດດ້ານດິຈິຕອລ ແລະ ກ່າວຕື່ມອີກວ່າ: “ການລິເລີ່ມນີ້ຈະຂະຫຍາຍການເຂົ້າເຖິງຖານລູກຄ້າໄດ້ຢ່າງຫຼວງຫຼາຍ ແລະ ຊ່ວຍໃຫ້ເພີ່ມລູກຄ້າໃຫມ່ໄດ້ໄວຂຶ້ນ. ການຫັນເປັນດິຈິຕອລແມ່ນຫົນທາງການກ້າວໄປສູ່ອະນາຄົດ ແລະ ເປັນຂໍ້ໄດ້ປຽບໃນການແຂ່ງຂັນ.ບໍລິສັດ ພົງສະຫວັນ ປະກັນໄພ (ເອພີເອ) ພວກເຮົາກໍ່ກຳລັງພັດທະນາເພື່ອກ້າວເຂົ້າສູ່ຂະບວນການນຳໃຊ້ດິຈິຕອລ ເພື່ອຍົກລະດັບການບໍລິການທີ່ດີຂື້ນໃຫ້ກັບລູກຄ້າຂອງພວກເຮົາເຊັ່ນດຽວກັນ.” ທ່ານ ດີນ ໂຣເບີດຣ໌ສັນ ໄດ້ເນັ້ນໜັກເຖິງການພົວພັນຮ່ວມມືທີ່ແໜ້ນແຟ້ນລະຫວ່າງ, ບໍລິສັດ ພົງສະຫວັນ ປະກັນໄພ ແລະ ບໍລິສັດ ສາຍຝົນ ວ່າ “ພວກເຮົາຕ້ອງການສະໜັບສະໜູນຄູ່ຮ່ວມທຸລະກິດ ເພື່ອການຂະຫຍາຍຕົວໄປນຳກັນ, ພວກເຮົາຮັບຮູ້ວ່າ ບໍລິສັດ ສາຍຝົນ ໄດ້ມີການຮ່ວມມືກັບບໍລິສັດປະກັນໄພອື່ນໆອີກ ເຊິ່ງນັ້ນກໍ່ເປັນຜົນດີສໍາລັບລູກຄ້າ ຍ້ອນວ່າມັນຈະເປັນແຮງກະຕຸ້ນໃຫ້ບໍລິສັດປະກັນໄພອື່ນໆ ກະຕືລືລົ້ນໃນປັບປຸງພັດທະນາໄປເລື້ອຍໆ. ເຊັ່ນດຽວກັບພາລະກິດຂອງ ພົງສະຫວັນ ປະກັນໄພ ແມ່ນການເປັນບໍລິສັດປະກັນໄພທີ່ໜ້າເຊື່ອຖື ແລະ ເປັນຜູ້ລິເລີ່ມການປ່ຽນແປງໃຫມ່ໆໃນ ສປປ ລາວ. ພວກເຮົາເປັນບໍລິສັດທ້ອງຖິ່ນ ແລະ ການຮ່ວມມືຍຸດທະສາດນີ້ສອດຄ່ອງກັບພາລະກິດຂອງພວກເຮົາເພື່ອສ້າງຄວາມແຕກຕ່າງໃນຊີວິດຂອງປະຊາຊົນ ແລະ ຊຸມຊົນທ້ອງຖິ່ນ.”
ທ່ານ ໄຊຍະສິດ ພົມມະຈິດ ຜູ້ອຳນວຍການ, ບໍລິສັດ ສາຍຝົນ ໂບຼກເກີປະກັນໄພລາວ ຈຳກັດ ກ່າວຕອບໃນພິທີວ່າ “ບໍລິສັດ ສາຍຟົນ ມີຄວາມພູມໃຈທີ່ໄດ້ເປັນພັນທະມິດ ແລະ ຮ່ວມມືກັບ ບໍລິສັດ ພົງສະຫວັນ ປະກັນໄພ (ເອພີເອ), ພວກເຮົາຕ້ອງການຂະຫຍາຍການຮ່ວມມືນີ້ ເພື່ອຜົນປະໂຫຍດຮ່ວມກັນໃນອະນາຄົດ”. ທ່ານ ໄຊຍະສິດ ພົມມະຈິດ ມີຄວາມຍິນດີກັບການເປີດຕົວຄວາມສາມາດດ້ານດິຈິຕອນຂອງບໍລິສັດໃນຄັ້ງນີ້ ແລະ ລະບຸວ່ານີ້ແມ່ນບາດກ້າວທໍາອິດໃນການເດີນທາງເຂົ້າສູ່ຮູບແບບດິຈິຕອນຂອງບໍລິສັດ, “ພວກເຮົາເລີ່ມຕົ້ນດ້ວຍ ປະກັນໄພລົດໃຫຍ່ ແລະ ວາງແຜນທີ່ຈະຂະຫຍາຍໄປສູ່ຜະລິດຕະພັນອື່ນໆໃນອະນາຄົດອັນໃກ້ນີ້, ອີກທັ້ງຍັງຕ້ອງການເຊື່ອມຕໍ່ຮູບແບບດິຈິຕອນນີ້ກັບຄູ່ຮ່ວມທຸລະກິດປະກັນໄພຂອງພວກເຮົາອີກຫຼາຍໆບໍລິສັດ ເພື່ອໃຫ້ລູກຄ້າສະມາດໄດ້ຮັບການຕອບສະຫນອງທີ່ວ່ອງໄວ ແລະ ມີປະສິດທິພາບ, ລວມເຖິງພວກເຮົາຍັງຫວັງວ່າຈະເສີມຂະຫຍາຍການພົວພັນຄູ່ຮ່ວມມືຍຸດທະສາດຂອງພວກເຮົາກັບ ພົງສະຫວັນ ປະກັນໄພ ໃນອະນາຄົດຂ້າງຫນ້າ ໂດຍການກໍານົດຂົງເຂດໃຫມ່ຂອງການຮ່ວມມື.”
